Genesis 40 — W88
40Verse 1Whanne these thingis weren doon so, it bifelde that twei geldyngis, the boteler and the baker `of the kyng of Egipt, synneden to her lord.Verse 2And Farao was wrooth ayens hem, for the toon was `souereyn to boteleris, the tother was `souereyn to bakeris.Verse 3And he sente hem in to the prisoun of the prince of knyytis, in which also Joseph was boundun.Verse 4And the keper of the prisoun bitook hem to Joseph, which also `mynystride to hem. Sumdel of tyme passide, and thei weren hooldun in kepyng, and bothe sien a dreem in o nyyt,Verse 5bi couenable expownyng to hem.Verse 6And whanne Joseph hadde entrid to hem eerli, and hadde seyn hem sori,Verse 7he axide hem, and seide, Whi is youre `face soriere to dai than it ys wont?Verse 8Whiche answeriden, We seiyen a dreem, and `noon is that expowneth to vs. And Joseph seide to hem, Whether expownyng is not of God? Telle ye to me what ye han seyn.Verse 9The `souereyn of boteleris telde first his dreem; Y seiy that a vyne bifore me,Verse 10in which weren thre siouns, wexide litil and litil in to buriounnyngis, and that aftir flouris grapys wexiden ripe,Verse 11and the cuppe of Farao was in myn hond; therfor Y took the grapis, and presside out in to the cuppe which Y helde, and Y yaf drynk to Farao.Verse 12Joseph answerde, This is the expownyng of the dreem; thre siouns ben yit thre daies,Verse 13aftir whiche Farao schal haue mynde of thi seruyce, and he schal restore thee in to the firste degree, and thou schal yyue to hym the cuppe, bi thin office, as thou were wont to do bifore.Verse 14Oneli haue thou mynde on me, whanne it is wel to thee, and thou schalt do merci with me, that thou make suggestioun to Farao, that he lede me out of this prisoun;Verse 15for theefli Y am takun awei fro the lond of Ebrews, and here Y am sent innocent in to prisoun.Verse 16The `maister of bakeris seiye that Joseph hadde expowned prudentli the dreem, and he seide, And Y seiy a dreem, that Y hadde thre panyeris of mele on myn heed,Verse 17and Y gesside that Y bar in o panyere, that was heiyere, alle metis that ben maad bi craft of bakers, and that briddis eeten therof.Verse 18Joseph answerde, This is the expownyng of the dreem; thre panyeris ben yit thre daies,Verse 19aftir whiche Farao schal take awei thin heed, and he schal hange thee in a cros, and briddis schulen todrawe thi fleischis.Verse 20Fro thennus the thridde dai was the dai of birthe of Farao, which made a greet feeste to hise children, and hadde mynde among metis on the maistir `of boteleris, and on the prince of bakeris;Verse 21and he restoride the oon in to his place, that he schulde dresse cuppe to `the kyng,Verse 22and he hangide `the tothir in a gebat, that the treuthe of `the expownere schulde be preued.Verse 23And netheles whanne prosperitees bifelden, the `souereyn of boteleris foryat `his expownere.