John 10 — W88
10Verse 1Treuli, treuli, Y seie to you, he that cometh not in by the dore in to the foold of scheep, but stieth bi another weie, is a nyyt theef and a dai theef.Verse 2But he that entrith bi the dore, is the scheepherde of the scheep.Verse 3To this the porter openeth, and the scheep heren his vois, and he clepith his owne scheep bi name, and ledith hem out.Verse 4And whanne he hath don out his owne scheep, he goith bifor hem, and the scheep suen hym; for thei knowun his vois.Verse 5But thei suen not an alien, but fleen from hym; for thei han not knowun the vois of aliens.Verse 6Jhesus seide to hem this prouerbe; but thei knewen not what he spak to hem.Verse 7Therfor Jhesus seide to hem eftsoone, Treuli, treuli, Y seie to you, that Y am the dore of the scheep.Verse 8As many as han come, weren nyyt theues and day theues, but the scheep herden not hem.Verse 9Y am the dore. If ony man schal entre bi me, he schal be sauyd; and he schal go ynne, and schal go out, and he schal fynde lesewis.Verse 10A nyyt theef cometh not, but that he stele, sle, and leese; and Y cam, that thei han lijf, and haue more plenteousli.Verse 11I am a good scheepherde; a good scheepherde yyueth his lijf for hise scheep.Verse 12But an hirid hyne, and that is not the scheepherde, whos ben not the scheep his owne, seeth a wolf comynge, and he leeueth the scheep, and fleeth; and the wolf rauyschith, and disparplith the scheep.Verse 13And the hirid hyne fleeth, for he is an hirid hyne, and it parteyneth not to hym of the scheep.Verse 14Y am a good scheepherde, and Y knowe my scheep, and my scheep knowen me.Verse 15As the fadir hath knowun me, Y knowe the fadir; and Y putte my lijf for my scheep.Verse 16Y haue othere scheep, that ben not of this foolde, and it bihoueth me to brynge hem togidir, and thei schulen here my vois; and it schal be maad o foolde and o scheepherde.Verse 17Therfor the fadir loueth me, for Y putte my lijf, that eftsoone Y take it.Verse 18No man takith it fro me, but Y putte it of my silf. Y haue power to putte it, and Y haue power to take it ayen. This maundement Y haue takun of my fadir.Verse 19Eft dissencioun was maad among the Jewis for these wordis.Verse 20And many of hem seiden, He hath a deuel, and maddith; what heren ye hym?Verse 21Othere men seiden, These wordis ben not of a man that hath a feend. Whether the deuel may opene the iyen of blynde men?Verse 22But the feestis of halewyng of the temple weren maad in Jerusalem, and it was wyntir.Verse 23And Jhesus walkide in the temple, in the porche of Salomon.Verse 24Therfor the Jewis camen aboute hym, and seiden to hym, Hou long takist thou awei oure soule? if thou art Crist, seie thou to vs opynli.Verse 25Jhesus answerde to hem, Y speke to you, and ye bileuen not; the werkis that Y do in the name of my fadir, beren witnessyng of me.Verse 26But ye bileuen not, for ye ben not of my scheep.Verse 27My scheep heren my vois, and Y knowe hem, and thei suen me.Verse 28And Y yyue to hem euerelastynge lijf, and thei schulen not perische with outen ende, and noon schal rauysche hem fro myn hoond.Verse 29That thing that my fadir yaf to me, is more than alle thingis; and no man may rauysche fro my fadris hoond.Verse 30Y and the fadir ben oon.Verse 31The Jewis token vp stoonys, to stoone hym.Verse 32Jhesus answerde to hem, Y haue schewide to you many good werkis of my fadir, for which werk of hem stonen ye me?Verse 33The Jewis answerden to hym, We stoonen thee not of good werk, but of blasfemye, and for thou, sithen thou art a man, makist thi silf God.Verse 34Jhesus answerde to hem, Whether it is not writun in youre lawe, That Y seide, Ye ben goddis?Verse 35Yf he seide that thei weren goddis, to whiche the word of God was maad, and scripture may not be vndon,Verse 36thilke that the fadir hath halewid, and hath sent in to the world, ye seien, That `thou blasfemest, for Y seide, Y am Goddis sone?Verse 37Yf Y do not the werkis of my fadir, nyle ye bileue to me;Verse 38but if Y do, thouy ye wolen not bileue to me, bileue ye to the werkis; that ye knowe and bileue, that the fadir is in me, and Y in the fadir.Verse 39Therfor thei souyten to take hym, and he wente out of her hondis.Verse 40And he wente eftsoone ouer Jordan, in to that place where Joon was firste baptisynge, and he dwelte there.Verse 41And manye camen to hym, and seiden, For Joon dide no myracle;Verse 42and alle thingis what euer Joon seide of this, weren sothe. And many bileueden in hym.