John 7 — W88
7Verse 1Aftir these thingis Jhesus walkide in to Galilee, for he wolde not walke in to Judee, for the Jewis souyten to sle hym.Verse 2And ther was neiy a feeste dai of the Jewis, Senofegia.Verse 3And hise britheren seiden to hym, Passe fro hennus, and go in to Judee, that also thi disciplis seen thi werkis that thou doist;Verse 4for no man doith ony thing in hiddlis, and hym silf sekith to be opyn. If thou doist these thingis, schewe thi silf to the world.Verse 5For nether hise britheren bileueden in hym.Verse 6Therfor Jhesus seith to hem, My tyme cam not yit, but youre tyme is euermore redi.Verse 7The world may not hate you, sothely it hatith me; for Y bere witnessyng therof, that the werkis of it ben yuele.Verse 8Go ye vp to this feeste dai, but Y schal not go vp to this feeste dai, for my tyme is not yit fulfillid.Verse 9Whanne he hadde seid these thingis, he dwelte in Galilee.Verse 10And aftir that hise britheren weren gon vp, thanne he yede vp to the feeste dai, not opynli, but as in priuyte.Verse 11Therfor the Jewis souyten hym in the feeste dai, and seiden, Where is he?Verse 12And myche grutchyng was of hym among the puple. For summe seiden, That he is good; and othere seiden, Nai, but he disceyueth the puple;Verse 13netheles no man spak opynli of hym, for drede of the Jewis.Verse 14But whanne the myddil feeste dai cam, Jhesus wente vp in to the temple, and tauyte.Verse 15And the Jewis wondriden, and seiden, Hou can this man lettris, sithen he hath not lerned?Verse 16Jhesus answerde to hem, and seide, My doctryne is not myn, but his that sente me.Verse 17If ony man wole do his wille, he schal knowe of the techyng, whethir it be of God, or Y speke of my silf.Verse 18He that spekith of hym silf, sekith his owne glorie; but he that sekith the glorie of hym that sente hym, is sothefast, and vnriytwisnesse is not in hym.Verse 19Whether Moises yaf not to you a lawe, and noon of you doith the lawe?Verse 20What seken ye to sle me? And the puple answerde, and seide, Thou hast a deuel; who sekith to sle thee?Verse 21Jhesus answerde, and seide to hem, Y haue don o werk, and alle ye wondren.Verse 22Therfor Moises yaf to you circumcisioun; not for it is of Moyses, but of the fadris; and in the sabat ye circumciden a man.Verse 23If a man take circumcicioun in the sabat, that the lawe of Moises be not brokun, han ye indignacioun to me, for Y made al a man hool in the sabat?Verse 24Nile ye deme aftir the face, but deme ye a riytful doom.Verse 25Therfor summe of Jerusalem seiden, Whethir this is not he, whom the Jewis seken to sle?Verse 26and lo! he spekith opynli, and thei seien no thing to hym. Whether the princes knewen verili, that this is Crist?Verse 27But we knowun this man, of whennus he is; but whanne Crist schal come, no man woot of whennus he is.Verse 28Therfor Jhesus criede in the temple `techynge, and seide, Ye knowen me, and `ye knowen of whennus Y am; and Y cam not of my silf, but he is trewe that sente me, whom ye knowen not.Verse 29Y knowe hym, and if Y seie that Y knowe hym not, Y schal be lijk to you, a liere; but Y knowe hym, for of hym Y am, and he sente me.Verse 30Therfor thei souyten to take hym, and no man sette on hym hoondis, for his our cam not yit.Verse 31And many of the puple bileueden in hym, and seiden, Whanne Crist schal come, whether he schal do mo tokenes, than tho that this doith?Verse 32Farisees herden the puple musinge of hym these thingis; and the princis and Farisees senten mynystris, to take hym.Verse 33Therfor Jhesus seide to hem, Yit a litil tyme Y am with you, and Y go to the fadir, that sente me.Verse 34Ye schulen seke me, and ye schulen not fynde; and where Y am, ye may not come.Verse 35Therfor the Jewis seiden to hem silf, Whidur schal this gon, for we schulen not fynde hym? whether he wole go in to the scateryng of hethene men, and wole teche the hethene?Verse 36What is this word, which he seide, Ye schulen seke me, and ye schulen not fynde; and where Y am, ye moun not come?Verse 37But in the laste dai of the greet feeste, Jhesus stood, and criede, and seide, If ony man thirstith, come he to me, and drynke.Verse 38He that bileueth in me, as the scripture seith, Floodis of quyk watir schulen flowe fro his wombe.Verse 39But he seide this thing of the Spirit, whom men that bileueden in hym schulden take; for the Spirit was not yit youun, for Jhesus was not yit glorified.Verse 40Therfor of that cumpanye, whanne thei hadden herd these wordis of hym, thei seiden, This is verili a prophete.Verse 41Othere seiden, This is Crist. `But summe seiden, Whether Crist cometh fro Galilee?Verse 42Whether the scripture seith not, that of the seed of Dauid, and of the castel of Bethleem, where Dauid was, Crist cometh?Verse 43Therfor discencioun was maad among the puple for hym.Verse 44For summe of hem wolden haue take hym, but no man sette hondis on hym.Verse 45Therfor the mynystris camen to bischopis and Farisees, and thei seiden to hem, Whi brouyten ye not hym?Verse 46The mynystris answeriden, Neuere man spak so, as this man spekith.Verse 47Therfor the Farisees answeriden to hem, Whether ye ben disseyued also?Verse 48whether ony of the pryncis or of the Farisees bileueden in hym?Verse 49But this puple, that knowith not the lawe, ben cursid.Verse 50Nychodeme seith to hem, he that cam to hym bi nyyt, that was oon of hem, Whethir oure lawe demith a man,Verse 51but it haue first herde of hym, and knowe what he doith?Verse 52Thei answeriden, and seiden to hym, Whether thou art a man of Galilee also? Seke thou scripturis, and se thou, that a prophete risith not of Galilee.Verse 53And thei turneden ayen, ech in to his hous.