Luke 19 — W88
19Verse 1And Jhesus `goynge yn, walkide thorou Jericho.Verse 2And lo! a man, Sache bi name, and this was a prince of pupplicans, and he was riche.Verse 3And he souyte to se Jhesu, who he was, and he myyte not, for the puple, for he was litil in stature.Verse 4And he ran bifore, and stiyede in to a sicomoure tree, to se hym; for he was to passe fro thennus.Verse 5And Jhesus biheld vp, whanne he cam to the place, and saiy hym, and seide to hym, Sache, haste thee, and come doun, for to dai Y mot dwelle in thin hous.Verse 6And he hiyynge cam doun, and ioiynge resseyuede hym.Verse 7And whanne alle men sayn, thei grutchiden seiynge, For he hadde turned to a synful man.Verse 8But Sache stood, and seide to the Lord, Lo! Lord, Y yyue the half of my good to pore men; and if Y haue ony thing defraudid ony man, Y yelde foure so myche.Verse 9Jhesus seith to hym, For to dai heelthe is maad to this hous, for that he is Abrahams sone;Verse 10for mannus sone cam to seke, and make saaf that thing that perischide.Verse 11Whanne thei herden these thingis, he addide, and seide a parable, for that he was nyy Jerusalem, `and for thei gessiden, that anoon the kyngdom of God schulde be schewid.Verse 12Therfor he seide, A worthi man wente in to a fer cuntre, to take to hym a kyngdom, and to turne ayen.Verse 13And whanne hise ten seruauntis weren clepid, he yaf to hem ten besauntis; and seide to hem, Chaffare ye, til Y come.Verse 14But hise citeseyns hatiden hym, and senten a messanger aftir hym, and seiden, We wolen not, that he regne on vs.Verse 15And it was don, that he turnede ayen, whan he hadde take the kyngdom; and he comaundide hise seruauntis to be clepid, to whiche he hadde yyue monei, to wite, hou myche ech hadde wonne bi chaffaryng.Verse 16And the firste cam, and seide, Lord, thi besaunt hath wonne ten besauntis.Verse 17He seide to hym, Wel be, thou good seruaunt; for in litil thing thou hast be trewe, thou schalt be hauynge power on ten citees.Verse 18And the tother cam, and seide, Lord, thi besaunt hath maad fyue besauntis.Verse 19And to this he seide, And be thou on fyue citees.Verse 20And the thridde cam, and seide, Lord, lo! thi besaunt, that Y hadde, put vp in a sudarie.Verse 21For Y dredde thee, for thou art `a sterne man; thou takist awey that that thou settidist not, and thou repist that that thou hast not sowun.Verse 22He seith to hym, Wickid seruaunt, of thi mouth Y deme thee. Wistist thou, that Y am `a sterne man, takynge awei that thing that Y settide not, and repyng ethat thing that Y sewe not?Verse 23and whi hast thou not youun my money to the bord, and Y comynge schulde haue axid it with vsuris?Verse 24And he seide to men stondynge nyy, Take ye awei fro hym the besaunt, and yyue ye to hym that hath ten beyauntis:Verse 25And thei seiden to hym, Lord, he hath ten besauntis.Verse 26And Y seie to you, to ech man that hath, it schal be youun, and he schal encreese; but fro him that hath not, also that thing that he hath, schal be takun of hym.Verse 27Netheles brynge ye hidur tho myn enemyes, that wolden not that Y regnede on hem, and sle ye bifor me.Verse 28And whanne these thingis weren seid, he wente bifore, and yede vp to Jerusalem.Verse 29And it was don, whanne Jhesus cam nyy to Bethfage and Betanye, at the mount, that is clepid of Olyuete, he sente hise twei disciplis, and seide,Verse 30Go ye in to the castel, that is ayens you; in to which as ye entren, ye schulen fynde a colt of an asse tied, on which neuer man sat; vntye ye hym, and brynge ye to me.Verse 31And if ony man axe you, whi ye vntien, thus ye schulen seie to hym, For the Lord desirith his werk.Verse 32And thei that weren sent, wenten forth, and fonden as he seide to hem, a colt stondynge.Verse 33And whanne thei vntieden the colt, the lordis of hym seiden to hem, What vntien ye the colt?Verse 34And thei seiden, For the Lord hath nede to hym.Verse 35And thei ledden hym to Jhesu; and thei castynge her clothis on the colt, setten Jhesu on hym.Verse 36And whanne he wente, thei strowiden her clothis in the weie.Verse 37And whanne he cam nyy to the comyng doun of the mount of Olyuete, al the puple that cam doun bygunnen to ioye, and to herie God with greet vois on alle the vertues, that thei hadden sayn,Verse 38and seiden, Blessid be the king, that cometh in the name of the Lord; pees in heuene, and glorie in hiye thingis.Verse 39And sum of the Farisees of the puple seiden to hym, Maister, blame thi disciplis.Verse 40And he seide to hem, Y seie to you, for if these ben stille, stoonus schulen crye.Verse 41And whanne he neiyede, `he seiy the citee,Verse 42and wepte on it, and seide, For if thou haddist knowun, thou schuldist wepe also; for in this dai the thingis ben in pees to thee, but now thei ben hid fro thin iyen.Verse 43But daies schulen come in thee, and thin enemyes schulen enuyroun thee with a pale, and thei schulen go aboute thee, and make thee streit on alle sidis,Verse 44and caste thee doun to the erthe, and thi sones that ben in thee; and thei schulen not leeue in thee a stoon on a stoon, for thou hast not knowun the tyme of thi visitacioun.Verse 45And he entride in to the temple, and bigan to caste out men sellynge ther inne and biynge,Verse 46and seide to hem, It is writun, That myn hous is an hous of preyer, but ye han maad it a den of theues.Verse 47And he was techynge euerydai in the temple. And the princis of prestis, and the scribis, and the princis of the puple souyten to lese hym;Verse 48and thei founden not, what thei schulden do to hym, for al the puple was ocupied, and herde hym.