Luke 21 — W88
21Verse 1And he biheeld, and saye tho riche men, that casten her yiftis in to the treserie;Verse 2but he saye also a litil pore widewe castynge twei ferthingis.Verse 3And he seide, Treuli Y seie to you, that this pore widewe keste more than alle men.Verse 4For whi alle these of thing that was plenteuouse to hem casten in to the yiftis of God; but this widewe of that thing that failide to hir, caste al hir liflode, that sche hadde.Verse 5And whanne sum men seiden of the temple, that it was apparailid with gode stoonus and yiftis,Verse 6he seide, These thingis that ye seen, daies schulen come, in whiche a stoon schal not be left on a stoon, which schal not be destried.Verse 7And thei axiden hym, and seiden, Comaundour, whanne schulen these thingis be? and what tokne schal be, whanne thei schulen bigynne to be don?Verse 8And he seide, Se ye, that ye be not disseyued; for many schulen come in my name, seiynge, For Y am, and the tyme schal neiye; therfor nyle ye go aftir hem.Verse 9And whanne ye schulen here batailis and stryues with ynne, nyle ye be aferd; it bihoueth first these thingis to be don, but not yit anoon is an ende.Verse 10Thanne he seide to hem, Folk schal rise ayens folk, and rewme ayens rewme;Verse 11grete mouyngis of erthe schulen be bi placis, and pestilencis, and hungris, and dredis fro heuene, and grete tokenes schulen be.Verse 12But bifore alle these thingis thei schulen sette her hoondis on you, and schulen pursue, bitakynge in to synagogis and kepyngis, drawynge to kyngis and to iusticis, for my name;Verse 13but it schal falle to you in to witnessyng.Verse 14Therfor putte ye in youre hertis, not to thenke bifore, hou ye schulen answere; for Y schal yyue to you mouth and wisdom,Verse 15to whiche alle youre aduersaries schulen not mowe ayenstonde, and ayenseie.Verse 16And ye schulen be takun of fadir, and modir, and britheren, and cosyns, and freendis, and bi deeth thei schulen turmente of you;Verse 17and ye schulen be in haate to alle men for my name.Verse 18And an heere of youre heed schal not perische;Verse 19in youre pacience ye schulen welde youre soulis.Verse 20But whanne ye schulen se Jerusalem ben enuyround with an oost, thanne wite ye, that the desolacioun of it schal neiye.Verse 21Thanne thei that ben in Judee, fle to the mountans; and thei that ben in the mydil of it, gon awei; and thei that ben in the cuntreis, entre not in to it.Verse 22For these ben daies of veniaunce, that alle thingis that ben writun, be fulfillid.Verse 23And wo to hem, that ben with child, and norischen in tho daies; for a greet diseese schal be on the erthe, and wraththe to this puple.Verse 24And thei schulen falle bi the scharpnesse of swerd, and thei schulen be led prisoneris in to alle folkis; and Jerusalem schal be defoulid of hethene men, til the tymes of naciouns be fulfillid.Verse 25And tokenes schulen be in the sunne, and the mone, and in the sterris; and in the erthe ouerleiyng of folkis, for confusioun of sown of the see and of floodis;Verse 26for men schulen wexe drye for drede and abidyng that schulen come to al the world; for vertues of heuenes schulen be mouyd.Verse 27And thanne thei schulen se mannys sone comynge in a cloude, with greet power and maieste.Verse 28And whanne these thingis bigynnen to be maad, biholde ye, and reise ye youre heedis, for youre redempcioun neiyeth.Verse 29And he seide to hem a liknesse, Se ye the fige tre, and alle trees,Verse 30whanne thei bryngen forth now of hem silf fruyt, ye witen that somer is nyy;Verse 31so ye, whanne ye seen these thingis to be don, wite ye, that the kyngdom of God is nyy.Verse 32Treuli Y seie to you, that this generacioun schal not passe, til alle thingis be don.Verse 33Heuene and erthe schulen passe, but my wordis schulen not passe.Verse 34But take ye heede to you silf, lest perauenture youre hertis be greuyd with glotony, and drunkenesse, and bisynessis of this lijf, and thilke dai come sodein on you; for as a snare it schal come on alle men,Verse 35that sitten on the face of al erthe.Verse 36Therfor wake ye, preiynge in ech tyme, that ye be hadde worthi to fle alle these thingis that ben to come, and to stonde bifor mannus sone.Verse 37And in daies he was techynge in the temple, but in nyytis he yede out, and dwellide in the mount, that is clepid of Olyuet.Verse 38And al the puple roos eerli, to come to hym in the temple, and to here hym.