Mark 3 — W88
3Verse 1And he entride eftsoone in to the synagoge, and there was a man hauynge a drye hoond.Verse 2And thei aspieden hym, if he helide in the sabatis, to accuse him.Verse 3And he seide to the man that hadde a drie hoond, Rise in to the myddil.Verse 4And he seith to hem, Is it leeueful to do wel in the sabatis, ether yuel? to make a soul saaf, ether to leese? And thei weren stille.Verse 5And he biheeld hem aboute with wraththe, and hadde sorewe on the blyndnesse of her herte, and seith to the man, Hold forth thin hoond. And he helde forth, and his hoond was restorid to hym.Verse 6Sotheli Farisees yeden out anoon, and maden a counsel with Erodians ayens hym, hou thei schulden lese hym.Verse 7But Jhesus with hise disciplis wente to the see; and myche puple fro Galilee and Judee suede hym,Verse 8and fro Jerusalem, and fro Ydume, and fro biyondis Jordan, and thei that weren aboute Tire and Sidon, a greet multitude, heringe the thingis that he dide, and cam to hym.Verse 9And Jhesus seide to hise disciplis, that the boot schulde serue hym, for the puple, lest thei thristen hym;Verse 10for he heelide many, so that thei felden fast to hym, to touche hym. And hou many euer hadde syknessis, and vnclene spirits,Verse 11whanne thei seyen hym, felden doun to hym, and crieden, seiynge, Thou art the sone of God.Verse 12And greetli he manasside hem, that thei schulden not make hym knowun.Verse 13And he wente in to an hille, and clepide to hym whom he wolde; and thei camen to hym.Verse 14And he made, that there weren twelue with hym, to sende hem to preche.Verse 15And he yaf to hem pouwer to heele sijknessis, and to caste out feendis.Verse 16And to Symount he yaf a name Petre, and he clepide James of Zebede and Joon,Verse 17the brother of James, and he yaf to hem names Boenarges, that is, sones of thundryng.Verse 18And he clepide Andrew and Filip, and Bartholomew and Matheu, and Thomas and James Alfey, and Thadee,Verse 19and Symount Cananee, and Judas Scarioth, that bitraiede hym.Verse 20And thei camen to an hous, and the puple cam togidere eftsoone, so that thei miyten not ete breed.Verse 21And whanne his kynnysmen hadden herd, thei wenten out `to holde him; for thei seiden, that he is turned in to woodnesse.Verse 22And the scribis that camen doun fro Jerusalem, seiden, That he hath Belsabub, and that in the prince of deuelis he castith out fendis.Verse 23And he clepide hem togidir, and he seide to hem in parablis, Hou may Sathanas caste out Sathanas?Verse 24And if a rewme be departid ayens it silf, thilke rewme may not stonde.Verse 25And if an hous be disparpoilid on it silf, thilke hous may not stonde.Verse 26And if Sathanas hath risun ayens hym silf, he is departid, and he schal not mowe stonde, but hath an ende.Verse 27No man may go in to a stronge mannus hous, and take awey hise vessels, but he bynde first the stronge man, and thanne he schal spoile his hous.Verse 28Treuli Y seie to you, that alle synnes and blasfemyes, bi whiche thei han blasfemed, schulen be foryouun to the sones of men.Verse 29But he that blasfemeth ayens the Hooli Goost, hath not remissioun in to with outen ende, but he schal be gilty of euerlastynge trespas.Verse 30For thei seiden, He hath an vnclene spirit.Verse 31And his modir and britheren camen, and thei stoden withoutforth, and senten to hym, and clepiden hym.Verse 32And the puple sat aboute hym; and thei seien to hym, Lo! thi modir and thi britheren with outforth seken thee.Verse 33And he answeride to hem, and seide, Who is my modir and my britheren?Verse 34And he bihelde thilke that saten aboute hym, and seide, Lo! my modir and my britheren.Verse 35For who that doith the wille of God, he is my brothir, and my sistir, and modir.