John 18 — W88
18Verse 1Whanne Jhesus hadde seid these thingis, he wente out with hise disciplis ouer the strond of Cedron, where was a yerd, in to which he entride, and hise disciplis.Verse 2And Judas, that bitrayede hym, knew the place, for ofte Jhesus cam thidur with hise disciplis.Verse 3Therfor whanne Judas hadde takun a cumpany of knyytis, and mynystris of the bischopis and of the Fariseis, he cam thidur with lanternys, and brondis, and armeris.Verse 4And so Jhesus witynge alle thingis that weren to come on hym, wente forth, and seide to hem, Whom seken ye?Verse 5Thei answeriden to hym, Jhesu of Nazareth. Jhesus seith to hem, Y am. And Judas that bitraiede hym, stood with hem.Verse 6And whanne he seide to hem, Y am, thei wenten abak, and fellen doun on the erthe.Verse 7And eft he axide hem, Whom seken ye? And thei seiden, Jhesu of Nazareth.Verse 8He answeride to hem, Y seide to you, that Y am; therfor if ye seken me, suffre ye these to go awei.Verse 9That the word which he seide schulde be fulfillid, For Y loste not ony of hem, whiche thou `hast youun to me.Verse 10Therfor Symount Petre hadde a swerd, and drow it out, and smoot the seruaunt of the bischop, and kittide of his riyt eer. And the name of the seruaunt was Malcus.Verse 11Therfor Jhesus seide to Petre, Putte thou thi swerd in to thi schethe; wolt thou not, that Y drynke the cuppe, that my fadir yaf to me?Verse 12Therfor the cumpenye of knyytis, and the tribune, and the mynystris of the Jewis, token Jhesu, and bounden hym,Verse 13and ledden hym first to Annas; for he was fadir of Caifas wijf, that was bischop of that yeer.Verse 14And it was Caifas, that yaf counsel to the Jewis, that it spedith, that o man die for the puple.Verse 15But Symount Petre suede Jhesu, and another disciple; and thilke disciple was knowun to the bischop. And he entride with Jhesu, in to the halle of the bischop;Verse 16but Petre stood at the dore with outforth. Therfor `the tother disciple, that was knowun to the bischop, wente out, and seide to the womman that kepte the dore, and brouyte in Petre.Verse 17And the damysel, kepere of the dore, seide to Petre, Whether thou art also of this mannys disciplis? He seide, Y am not.Verse 18And the seruantis and mynystris stooden at the coolis, for it was coold, and thei warmyden hem; and Petre was with hem, stondynge and warmynge hym.Verse 19And the bischop axide Jhesu of hise disciplis, and of his techyng.Verse 20Jhesus answerde to hym, Y haue spokun opynli to the world; Y tauyte euermore in the synagoge, and in the temple, whider alle the Jewis camen togidere, and in hiddlis Y spak no thing.Verse 21What axist thou me? axe hem that herden, what Y haue spokun to hem; lo! thei witen, what thingis Y haue seid.Verse 22Whanne he hadde seid these thingis, oon of the mynystris stondynge niy, yaf a buffat to Jhesu, and seide, Answerist thou so to the bischop?Verse 23Jhesus answeride to hym, If Y haue spokun yuel, bere thou witnessyng of yuel; but if Y seide wel, whi smytist thou me?Verse 24And Annas sente hym boundun to Caifas, the bischop.Verse 25And Symount Petre stood, and warmyde him; and thei seiden to hym, Whether also thou art his disciple? He denyede, and seide, Y am not.Verse 26Oon of the bischops seruantis, cosyn of hym, whos eere Petre kitte of, seide, Say Y thee not in the yerd with hym?Verse 27And Petre eftsoone denyede, and anoon the cok crew.Verse 28Thanne thei ledden Jhesu to Cayfas, in to the moot halle; and it was eerli, and thei entriden not in to the moot halle, that thei schulden not be defoulid, but that thei schulden ete pask.Verse 29Therfor Pilat wente out with outforth to hem, and seide, What accusyng brynge ye ayens this man?Verse 30Thei answeriden, and seiden to hym, If this were not a mysdoere, we hadden not bitakun hym to thee.Verse 31Thanne Pilat seith to hem, Take ye hym, and deme ye him, after youre lawe. And the Jewis seiden to hym, It is not leueful to vs to sle ony man;Verse 32that the word of Jhesu schulde be fulfillid, whiche he seide, signifiynge bi what deth he schulde die.Verse 33Therfor eftsoone Pilat entride in to the moot halle, and clepide Jhesu, and seide to hym, Art thou kyng of Jewis?Verse 34Jhesus answerde, and seide to hym, Seist thou this thing of thi silf, ether othere han seid to thee of me?Verse 35Pilat answeride, Whether Y am a Jewe? Thi folc and bischops bitoken thee to me; what hast thou don?Verse 36Jhesus answeride, My kingdom is not of this world; if my kingdom were of this world, my mynystris schulden stryue, that Y schulde not be takun to the Jewis; but now my kingdom is not here.Verse 37And so Pilat seide to hym, Thanne `thou art a king. Jhesus answeride, Thou seist, that Y am a king. To this thing Y am borun, and to this Y `am comun in to the world, to bere witnessing to treuthe. Eche that is of treuthe, herith my vois.Verse 38Pilat seith to hym, What is treuthe? And whanne he hadde seid this thing, eft he wente out to the Jewis, and seide to hem, Y fynde no cause in hym.Verse 39But it is a custom to you, that Y delyuere oon to you in pask; therfor wole ye that Y delyuere to you the kyng of Jewis?Verse 40Alle crieden eftsoone, and seiden, Not this, but Baraban. And Barabas was a theef.