John 19 — W88
19Verse 1Therfor Pilat took thanne Jhesu, and scourgide.Verse 2And kniytis writhen a coroun of thornes, and setten on his heed, and diden aboute hym a cloth of purpur,Verse 3and camen to him, and seiden, Heil, kyng of Jewis. And thei yauen to him buffatis.Verse 4Eftsoone Pilat wente out, and seide to hem, Lo! Y brynge hym out to you, that ye knowe, that Y fynde no cause in him.Verse 5And so Jhesus wente out, berynge a coroun of thornes, and a cloth of purpur. And he seith to hem, Lo! the man.Verse 6But whanne the bischopis and mynystris hadden seyn hym, thei crieden, and seiden, Crucifie, crucifie hym. Pilat seith to hem, Take ye hym, and crucifie ye, for Y fynde no cause in hym.Verse 7The Jewis answeriden to hym. We han a lawe, and bi the lawe he owith to die, for he made hym Goddis sone.Verse 8Therfor whanne Pilat hadde herd this word, he dredde the more.Verse 9And he wente in to the moot halle eftsoone, and seide to Jhesu, Of whennus art thou? But Jhesus yaf noon answere to him.Verse 10Pilat seith to him, Spekist thou not to me? Woost thou not, that Y haue power to crucifie thee, and Y haue power to delyuere thee?Verse 11Jhesus answeride, Thou schuldist not `haue ony power ayens me, but it were youun to thee from aboue; therfor he that bitook me to thee, hath the more synne.Verse 12Fro that tyme Pilat souyte to delyuere hym; but the Jewis crieden, and seiden, If thou delyuerist this man, thou art not the emperouris freend; for ech man that makith hym silf king, ayen seith the emperoure.Verse 13And Pilat, whanne he hadde herd these wordis, ledde Jhesu forth, and sat for domesman in a place, that is seid Licostratos, but in Ebrew Golgatha.Verse 14And it was pask eue, as it were the sixte our. And he seith to the Jewis, Lo! youre king.Verse 15But thei crieden, and seiden, Take awei, take awei; crucifie him. Pilat seith to hem, Schal I crucifie youre king? The bischops answeriden, We han no king but the emperour.Verse 16And thanne Pilat bitook him to hem, that he schulde be crucified. And thei token Jhesu, and ledden him out.Verse 17And he bar to hym silf a cros, and wente out in to that place, that is seid of Caluarie, in Ebreu Golgatha;Verse 18where thei crucifieden him, and othere tweyne with him, oon on this side and oon on that side, and Jhesus in the myddil.Verse 19And Pilat wroot a title, and sette on the cros; and it was writun, Jhesu of Nazareth, king of Jewis.Verse 20Therfor manye of the Jewis redden this title, for the place where Jhesus was crucified, was niy the citee, and it was writun in Ebreu, Greek, and Latyn.Verse 21Therfor the bischops of the Jewis seiden to Pilat, Nyle thou write kyng of Jewis, but for he seide, Y am king of Jewis.Verse 22Pilat answeride, That that Y haue writun, Y haue writun.Verse 23Therfor the knyytis whanne thei hadden crucified hym, token hise clothis, and maden foure partis, to ech knyyt a part, and a coot. And the coot was without seem, and wouun al aboute.Verse 24Therfor thei seiden togidere, Kitte we not it, but caste we lot, whos it is; that the scripture be fulfillid, seiynge, Thei partiden my clothis to hem, and on my cloth thei casten lot. And the kniytis diden these thingis.Verse 25But bisidis the cros of Jhesu stoden his modir, and the sistir of his modir, Marie Cleofe, and Marie Maudeleyne.Verse 26Therfor whanne Jhesu hadde seyn his modir, and the disciple stondynge, whom he louyde, he seith to hise modir, Womman, lo thi sone.Verse 27Aftyrward he seith to the disciple, Lo! thi modir. And fro that our the disciple took hir in to his modir.Verse 28Aftirward Jhesus witynge, that now alle thingis ben endid, that the scripture were fulfillid, he seith, Y thirste.Verse 29And a vessel was set ful of vynegre. And thei `leiden in isope aboute the spounge ful of vynegre, and putten to his mouth.Verse 30Therfor whanne Jhesus hadde `takun the vynegre, he seid, It is endid. And `whanne his heed was bowid doun, `he yaf vp the goost.Verse 31Therfor for it was the pask eue, that the bodies schulden not abide on the cros in the sabat, for that was a greet sabat dai, the Jewis preiden Pilat, that the hipis of hem schulden be brokun, and thei takun awei.Verse 32Therfor knyytis camen, and thei braken the thies of the firste, and of the tothere, that was crucified with hym.Verse 33But whanne thei weren comun to Jhesu, as thei sayn him deed thanne, thei braken not hise thies;Verse 34but oon of the knyytis openyde his side with a spere, and anoon blood and watir wenten out.Verse 35And he that saiy, bare witnessyng, and his witnessing is trewe; and he woot that he seith trewe thingis, that ye bileue.Verse 36And these thingis weren don, that the scripture schulde be fulfillid, Ye schulen not breke a boon of hym.Verse 37And eftsoone another scripture seith, Thei schulen se in whom thei piyten thorow.Verse 38But after these thingis Joseph of Armathi preyede Pilat, that he schulde take awei the bodi of Jhesu, for that he was a disciple of Jhesu, but priui for drede of the Jewis. And Pilat suffride. And so he cam, and took awei the bodi of Jhesu.Verse 39And Nychodeme cam also, that hadde come to hym first bi nyyt, and brouyte a meddlynge of myrre and aloes, as it were an hundrid pound.Verse 40And thei token the bodi of Jhesu, and boundun it in lynun clothis with swete smellynge oynementis, as it is custom to Jewis for to birie.Verse 41And in the place where he was crucified, was a yerd, and in the yerd a newe graue, in which yit no man was leid.Verse 42Therfor there thei putten Jhesu, for the vigilie of Jewis feeste, for the sepulcre was niy.